FLEX-ის ფინალისტები აჭარიდან

FLEX-ის, ანუ მომავალ ლიდერთა გაცვლითი პროგრამის 2019 წლის გამარჯვებულები გამოვლინდნენ. „ბათუმელები“ სამ გამარჯვებულს ესაუბრა, ისინი სექტემბრიდან აშშ-ში ერთი წლით გაემგზავრებიან,  იცხოვრებენ ადგილობრივების  ოჯახებში და განათლებას მიიღებენ ამერიკულ სკოლაში.

ერთ-ერთი გამარჯვებული  16 წლის თამარ წითელაძეა. ის სოფელ კირნათში, მეთერთმეტე კლასში სწავლობს. FLEX-ში მონაწილეობა გასულ წელსაც მიიღო, მაგრამ ფინალში მეორე მცდელობისას გადავიდა. თამარის აზრით, გაცვლით პროგრამაში მონაწილეობა  მას მეტ გამოცდილებას მისცემს.

„იმ ბავშვებისგან, ვინც „ფლექსის“ მონაწილე იყო, მესმოდა, რომ საკუთარი თავი აღმოაჩინეს იქ და გაიგეს სინამდვილეში რა უნდოდათ. ამიტომ, ჩემი ინტერესი ამანაც განაპირობა. ვფიქრობ პიროვნულ ზრდაში დამეხმარება ეს პროგრამა“ – გვეუბნება თამარი.

თამარ წითელაძე

გაცვლითი პროგრამა ახალგაზრდების დიდი ნაწილისთვის ერთგვარი თავგადასავალია. თამარსაც მსგავსი მოლოდინები აქვს. გარდა ამისა, მას უნდა რომ უკეთ გაერკვეს საკუთარ ინტერესებში:

„ძალიან მომწონს საგამომცემლო საქმიანობა, წერა, თარგმნა, ლიტერატურა… სკოლაში კარგად ვსწავლობ, მაგრამ ამერიკული სკოლები მოსწავლეებს უფრო მეტი განვითარების საშუალებას აძლევს, რადგან ბევრი სპორტული, სახელოვნებო და სამეცნიერო წრეები აქვთ, რომელიც ერთგვარი გამოწვევა იქნება ჩემთვის და თუ აღმოვაჩენ რაიმე ახალს, შესაძლოა ამით დავინტერესდე“.

თამარი ამბობს, რომ ოჯახისგან შორს აქამდე არ უცხოვრია, თუმცა ოკეანისგაღმა, დამოუკიდებლად ცხოვრების შიში არ აქვს. „ველოდები როდის გამომეხმაურება მიმღები ოჯახი, არ ვნერვიულობ, რადგან ვფიქრობ, რომ ოჯახი, რომელიც მზად არის მიმასპინძლოს, ცუდი არ იქნება“.

თამარი ამბობს, რომ რაც უფრო მრავალფეროვნად წარმოაჩენ საკუთარ თავს, მით უფრო მეტი შანსი გაქვს პროგრამაში გამარჯვების.

ბექა ბოლქვაძე ბათუმის პირველ საჯარო სკოლაში სწავლობს. მეთერთმეტე კლასელია. გაცვლით პროგრამაში შარშან ისინიც მონაწილეობდა, თუმცა თამარის მსგავსად, ფინალში წელს გადავიდა. „ალბათ შარშანდელი გამოცდილებაც დამეხმარა“ – გვეუბნება ის.

ბექა ამბობს, რომ ამერიკაში სწავლა მისი ბავშვობის ოცნება იყო. „ფილმებს როცა ვუყურებდი, მომწონდა იქაური სკოლები. გარდა ამისა, კარგია, იმიტომ რომ დამოუკიდებელ ცხოვრებას მივეჩვევი და ესეც ალბათ უფრო გამზრდის“.

ბექას მოლოდინი აქვს, რომ ამერიკაში გატარებული ეს ერთი წელი მისთვის იქნება საუკეთესო. „ვეცდები მაქსიმალურად გამოვიყენო ყველა შესაძლებლობა რაც იქ მექნება. ამ პროგრამის მეშვეობით უკეთ გავიცნობ ამერიკელებს, მათ კულტურას, ფასეულობებს, განათლების სისტემას. ალბათ ვნახავ მეგაპოლისებსაც და ეს ყველაფერი ძალიან მახარებს“.

ბექა ბოლქვაძე

ბექა ამბობს, რომ სკოლაში კარგად სწავლობს, თუმცა ჯერ კონკრეტული პროფესიის მიმართ ინტერესები ჩამოყალიბებული არ აქვს. „ვფიქრობ, ამერიკაში ყოფნა უფრო გამიფართოვებს თვალსაწიერს, სხვა კუთხით დამანახებს ბევრ რამეს, ფართო არჩევანი მექნება, რომ ჩავერთო სხვადასხვა აქტივობაში და  რაც ქართულ სკოლაში ვერ შევძელი, მინდა რომ იქ მივიღო.

ელემენტარული რომ ავიღოთ, ამერიკულ სკოლაში ძალიან დიდი მნიშვნელობა ენიჭება სპორტს, ჩემი ყველაზე დიდი გატაცებაა სპორტი და იქაც ვეცდები, რომ სპორტით დავკავდე.  არის მუსიკალური ბენდები, დრამა და ეს მრავალფეროვნება დამეხმარება პროფესიული არჩევანის გაკეთებაში“ – ამბობს ბექა.

FLEX-ის მესამე ფინალისტი, რომელსაც „ბათუმელები“ ესაუბრა, ბათუმის მეორე საჯარო სკოლის მეათეკლასელი, მარიამ გოგიტიძეა. „ამ პროგრამის შესახებ მეშვიდე კლასში გავიგე და მას შემდეგ სულ მინდოდა მონაწილეობა, რადგან საერთაშორისო გარემო, რომელიც ამერიკულ სკოლებშია, საინტერესოა“ – გვეუბნება ის.

მარიამ გოგიტიძე

მარიამის აზრით, კულტურული და ეთნიკური მრავალფეროვნება, განსხვავებული საგანმანათლებო სისტემა, ყოველთვის საინტერესოა. „მინდა ახალი მეგობრების გაჩენაც.“

მარიამს სურს ამერიკული სკოლაში სწავლისას მუსიკალურ ჯგუფში გაწევრიანდეს. ასევე უნდა გერმანული ენის შესწავლა: „ჩვენს სკოლაში ვსწავლობ, მაგრამ აქ არ გვაქვს კლუბი. იმ სკოლაში სადაც მივდივარ, გერმანული კლუბია და კარგია. შეიძლება ავირჩიო ტექნოლოგიური ან სამეცნიერო კლუბი“.

მარიამის აზრით, მისი გამარჯვება ლიდერულმა თვისებებმა განაპირობა. „ჯგუფური აქტივობის დროს ვცდილობდი ყველა ბავშვი ჩართულიყო პროცესში და ვფიქრობ ამანაც განსაზღვრა“.

მარიამი ამბობს, რომ ამერიკაში დიდი მოლოდინებით მიდის, თუმცა ქართულ სკოლაში დაბრუნებაც მისთვის რთული არ იქნება.

გაცვლითი პროგრამა საქართველოში უკვე რამდენიმე წელია რაც მოქმედებს, პროგრამა სრულად ფინანსდება ამერიკის სახელმწიფო დეპარტამენტის მიერ. პროგრამის მიზანი ამერიკელ ხალხსა და სხვა ქვეყნებს შორის ურთიერთგაგების დამყარება.

წყარო

Facebook Comments

დაგხვეხმარეთ, რათა შევძლოთ სხვების დახმარება

ალბათ დაგვეთანხმებით, რომ იმიგრაციის პროცესი რთულია, განსაკუთრებით მაშინ რთულდება, თუ არავინ გყავს ვინც შეიძლება დაგეხმაროს და დაგაკვალიანოს. ჩვენი საიტის მიზანი სწორედ ეს გახლავთ, დაკვალიანება/დახმარება და იმიგრაციის პროცესის გამარტივება.

სავარაუდოდ ბევრ თქვენგანს დავეხმარეთ კიდეც უკვე, ჩვენი საიტი და ფეისბუქ გვერდი აქტიურ რეჟიმში აქვეყნებს იმიგრაციის პროცესისთვის საჭირო ინფორმაციას და ასევე ვპასუხობთ თქვენს კითხვებს რომელიც ეხება იმიგრაციის პროცესს და აქ დაფუძნებას.

საიტის შენახვა და კონტეტით გამდიდრება გარკვეულ ხარჯებთან არის დაკავშირებული, როგორც შენიშნეთ, ჩვენს საიტზე არ იდება რეკლამები, ამიტომაც საიტს არ გააჩნია შემოსავალი გარდა ცალკეული შემთხვევებისა, როცა ჩვენ, საკუთარი ხარჯებით ვფარავთ საიტის ტექნიკური გამართვისა და შენახვის ხარჯებს. სწორედ ამიტომ, გთხოვთ დახმარებას, რათა შენარჩუნდეს ეს საინფორმაციო რესურსი, რომელიც უანგაროდ ემსახურება სათვისტომოს.